ഈ പ്രഭാഷണങ്ങൾക്കോ ആത്മസാക്ഷാത്കാരത്തിനോ ശ്രീ മാതാജി ഒരിക്കലും പണം ഈടാക്കിയിരുന്നില്ല, എല്ലാ മനുഷ്യരുടെയും ഉള്ളിൽ ഉറങ്ങിക്കിടക്കുന്ന ആത്മീയ ഊർജ്ജത്തിന്റെ ഉണർവ് അവരുടെ ജന്മാവകാശമാണെന്നും അതിനാൽ അതിന് പണം ഈടാക്കാനാകില്ലെന്നും അവർ ശഠിച്ചു. ശ്രീ മാതാജി വികസിപ്പിച്ച ആത്മസാക്ഷാത്കാരത്തിലൂടെയുള്ള ധ്യാന രീതി സഹജ യോഗ എന്ന പേരിലാണ് അറിയപ്പെട്ടത്. യുണൈറ്റഡ് കിംഗ്ഡത്തിൽ ആദ്യം തന്റെ ശ്രമങ്ങൾ കേന്ദ്രീകരിച്ച്, ചെറിയ പട്ടണങ്ങളിലും വലിയ നഗരങ്ങളിലുമുള്ള പ്രേക്ഷകരിലേക്ക് അവർ തന്റെ സന്ദേശം എത്തിച്ചു. രാജ്യത്തിലുടനീളം യാത്ര ചെയ്ത് റേഡിയോ, ടെലിവിഷൻ എന്നീ മാധ്യമങ്ങളിൽ അഭിമുഖങ്ങൾ നൽകി, പൊതു മന്ദിരങ്ങളിൽ പ്രഭാഷണങ്ങൾ നടത്തി, പ്രേക്ഷകരുടെ ഇടയിൽ നിന്നും വരുന്ന വ്യക്തികളുടെ കൂടെ മണിക്കൂറുകൾ ചെലവഴിച്ച്, അവരുടെ കഥകളും പ്രശ്നങ്ങളും ക്ഷമയോടെ കേൾക്കുകയും ഉപദേശം നൽകുകയും ചെയ്തു.