1947-ൽ ശ്രീ മാതാജി ചന്ദ്രിക പ്രസാദ് ശ്രീവാസ്തവയെ വിവാഹം കഴിച്ചു. അന്തരിച്ച ഇന്ത്യൻ പ്രധാനമന്ത്രി ലാൽ ബഹദൂർ ശാസ്ത്രിയുടെ പേഴ്‌സണൽ സെക്രട്ടറിയായിരുന്ന ശ്രീ സി. പി. ശ്രീവാസ്തവ തുടർച്ചയായി നാല് തവണ യുഎൻ ഇന്റർനാഷണൽ മാരിടൈം ഓർഗനൈസേഷന്റെ സെക്രട്ടറി ജനറലായി സേവനമനുഷ്ഠിച്ചു. അവർക്ക് രണ്ട് പെൺമക്കളുണ്ടായിരുന്നു. ഈ സമയത്ത് ശ്രീ മാതാജി തന്റെ പെൺമക്കളെ വളർത്തുകയും തന്റെ പ്രഗത്ഭനായ ഭർത്താവിന്റെ ഔദ്യോഗികജീവിതത്തെ പിന്തുണയ്ക്കുകയും ചെയ്യുന്നതോടൊപ്പം, തന്റെ ചുറ്റുമുള്ള ലോകകാര്യങ്ങളിൽ പരോപകാരതത്പരത പ്രകടിപ്പിക്കുന്നത് കാണാമായിരുന്നു. വ്യത്യസ്‌ത രാജ്യങ്ങൾ, സംസ്‌കാരങ്ങൾ, വരുമാന നിലവാരങ്ങൾ, പശ്ചാത്തലങ്ങൾ എന്നിവയിൽ നിന്നുള്ള നിരവധി ആളുകളുമായി ശ്രീ മാതാജി മുഖാമുഖം കാണുകയും, അവരോട് ആത്മാർത്ഥമായ ആദരവോടെ ബന്ധപ്പെടുകയും ചെയ്തു. പ്രധാന നേതാക്കളുമായി സംസ്ഥാന വിഷയങ്ങൾ ചർച്ച ചെയ്യുമ്പോഴായാലും, ഒരു ടാക്സി ഡ്രൈവറുമായി കുടുംബ പ്രശ്‌നങ്ങൾ ചർച്ച ചെയ്യുമ്പോഴായാലും, ശ്രീ മാതാജി എപ്പോഴും അവരെ കേൾക്കാനും മനസ്സിലാക്കാനും തയ്യാറായിരുന്നു. ശ്രീ മാതാജി മുൻവിധികൾക്ക് എതിരായിരുന്നു, ആവശ്യമുള്ളവർക്ക് സംരക്ഷണം വാഗ്ദാനം ചെയ്തു, ജീവകാരുണ്യ പ്രവർത്തനങ്ങളിൽ ഏർപ്പെട്ടു, സംഗീതത്തിലൂടെയും സിനിമയിലൂടെയും സംസ്കാരത്തെ പ്രോത്സാഹിപ്പിച്ചു, ഭൂമിയിൽ കൃഷി ചെയ്തു, അങ്ങനെ തിരക്കേറിയ കുടുംബ ജീവിതം നയിച്ചു. ശ്രീ മാതാജി സ്നേഹനിധിയായ ഒരു ഭാര്യയും അമ്മയും സഹോദരിയുമായിരുന്നു, പിന്നീട് അവർ ഒരു മുത്തശ്ശിയുമായി.

ശ്രീ മാതാജി, മനുഷ്യപ്രകൃതത്തെ കുറിച്ചുള്ള തന്റെ കാഴ്ച്ചപ്പാട് ഗഹനമാക്കാനും, മനുഷ്യരെ അവരുടെ കഴിവിന്റെ പരമാവധിയിലേക്ക് ഉയരാൻ സഹായിക്കുന്നതിനുതകുന്ന, ഏറ്റവും ശ്രേഷ്ഠമായ മാർഗ്ഗത്തിൽ ശ്രദ്ധ കേന്ദ്രീകരിച്ചു. എല്ലാവരിലും അടങ്ങിയിരിക്കുന്ന അന്തർനിർമ്മിതമായ (കുണ്ഡലിനി) എന്ന് വിളിക്കപ്പെടുന്ന) സൂക്ഷ്മമായ ഊർജ്ജത്തിന്റെ സജീവമായ പ്രക്രിയയിലൂടെ സംഭവിക്കുന്ന ആത്മസാക്ഷാത്കാരത്തിലൂടെ മാത്രമേ ഒരു പരിവർത്തനം സംഭവിക്കുകയുള്ളൂവെന്ന് ശ്രീ മാതാജി മനസ്സിലാക്കി. ഈ ഊർജ്ജത്തിന്റെ ഉണർവ് മറ്റുള്ളവരുമായി പങ്കുവയ്ക്കുന്നതിനായി തന്റെ ജീവിതം സമർപ്പിക്കുന്നതിന് മുമ്പ്, ശ്രീമാതാജി അത് സ്വയം അനുഭവിച്ചറിഞ്ഞിരുന്നു.

1970 മെയ് 5 ന്, ശ്രീ മാതാജി തന്റെ ആത്മീയ ജീവിത പ്രവർത്തനങ്ങൾ ആരംഭിച്ചു. നാല്പത്തിയേഴാമത്തെ വയസ്സിൽ ശ്രീ മാതാജി അതിനായി ഒരു വഴി കണ്ടെത്തി. വൻതോതിൽ ആത്മസാക്ഷാത്കാരം പ്രാപ്തമാക്കാനുള്ള ഒരു രീതി വികസിപ്പിച്ചെടുത്തു. ആളുകൾക്ക് രൂപാന്തരപ്പെടാനും സ്വയം സുഖപ്പെടുത്താനും സഹായിക്കുന്ന ഒരു യഥാർത്ഥ അനുഭവം നൽകാൻ ശ്രീ മാതാജി ആഗ്രഹിച്ചു. സത്യാന്വേഷികളായ ആളുകളെ ചൂഷണം ചെയ്തിരുന്ന പല ഗുരുക്കന്മാരിൽ നിന്നും വ്യത്യസ്തമായി, ഈ അറിവ് ഉപയോഗിച്ച് അന്വേഷകനെ സ്വയം ശാക്തീകരിക്കാനാണ് ശ്രീ മാതാജി ആഗ്രഹിച്ചത്. അത്തരം എല്ലാ വ്യാജ ഗുരുക്കന്മാരെയും ശ്രീ മാതാജി അപലപിക്കുകയും ജീവിതത്തിലുടനീളം വഞ്ചനാപരവും ദുരുപയോഗം ചെയ്യുന്നതുമായ ആത്മീയ ആചാരങ്ങൾക്കെതിരെ മുന്നറിയിപ്പ് നൽകുകയും ചെയ്തു.

ശ്രീ മാതാജിയുടെ ഭർത്താവ് യുഎൻ മാരിടൈം ഓർഗനൈസേഷന്റെ സെക്രട്ടറി ജനറലായപ്പോൾ ശ്രീ മാതാജി അദ്ദേഹത്തോടൊപ്പം ലണ്ടനിലേക്ക് താമസം മാറുകയും ഒരു ചെറിയ കൂട്ടം ആളുകളുമായി ആത്മീയ പ്രവർത്തനം ആരംഭിക്കുകയും ചെയ്തു. ശ്രീ മാതാജി യുണൈറ്റഡ് കിംഗ്ഡം മുഴുവനും പര്യടനം നടത്തി, പ്രഭാഷണങ്ങളും സ്വയം തിരിച്ചറിവിന്റെ അനുഭവങ്ങളും പങ്കുവച്ചു. ഈ പരിപാടികൾക്കായി ശ്രീ മാതാജി ഒരിക്കലും പണം ഈടാക്കിയിട്ടില്ല, എല്ലാ മനുഷ്യരുടെയും ഉള്ളിൽ ഉറങ്ങിക്കിടക്കുന്ന ഈ ആത്മീയ ഊർജ്ജത്തെ ഉണർത്തുന്നത് അവരുടെ ജന്മാവകാശമാണെന്നും അതിനാൽ പണം വാങ്ങാനാവില്ലെന്നും ശഠിച്ചു. ചുറ്റുമുള്ളവർ ശ്രീ മാതാജിയുടെ അസാധാരണമായ ആത്മീയവും മാതൃത്വവുമായ ഗുണങ്ങൾ തിരിച്ചറിയാൻ തുടങ്ങിയപ്പോൾ, താമസിയാതെ ശ്രീ മാതാജിയെ "ബഹുമാനപ്പെട്ട അമ്മ" എന്നർത്ഥമുള്ള "ശ്രീ മാതാജി" എന്ന ബഹുമതി നൽകി ആദരിച്ചു.

ശ്രീ മാതാജി വികസിപ്പിച്ച ആത്മസാക്ഷാത്കാരത്തിലൂടെയുള്ള ധ്യാന രീതിയെ സഹജ യോഗ എന്നാണ് വിളിച്ചിരുന്നത്. 1980-കളിൽ ശ്രീ മാതാജി യൂറോപ്പ്, ഓസ്‌ട്രേലിയ, വടക്കേ അമേരിക്ക എന്നിവിടങ്ങളിൽ തുടർച്ചയായും വിശ്രമമില്ലാതെയും പര്യടനം നടത്തി, താൽപ്പര്യമുള്ളവർക്ക് ഈ രീതി സൗജന്യമായി പഠിപ്പിച്ചു. 1990-കളിൽ ശ്രീ മാതാജിയുടെ യാത്രകൾ തെക്കേ അമേരിക്ക, ആഫ്രിക്ക, റഷ്യ, കിഴക്കൻ യൂറോപ്പ്, ഏഷ്യ, പസഫിക് എന്നീ മേഖലകളിലേക്ക് വ്യാപിച്ചു.

ലോകമെമ്പാടുമുള്ള സ്ഥാപനങ്ങൾ ശ്രീ മാതാജിക്ക് ഓണററി അവാർഡുകളും ഡോക്ടറേറ്റുകളും നൽകി ആദരിച്ചു. 1995-ൽ ബീജിംഗിൽ നടന്ന നാലാമത്തെ ലോക സ്ത്രീശാക്‌തീകരണ സമ്മേളനത്തിൽ ശ്രീ മാതാജി സംസാരിച്ചു. 1997-ൽ ലണ്ടനിലെ റോയൽ ആൽബർട്ട് ഹാളിൽ വെച്ച് ക്ലെസ് നോബൽ, ശ്രീ മാതാജിയുടെ പേര് സമാധാനത്തിനുള്ള നോബൽ സമ്മാന നാമനിർദ്ദേശ പട്ടികയിൽ ഉൾപ്പെടുത്തുന്നതിനെ കുറിച്ച് സംസാരിച്ചു. ശ്രീ മാതാജിയുടെയും സഹജ യോഗയുടെയും വലിയ ആരാധകനായ അദ്ദേഹം അതിനെ "മനുഷ്യരാശിയുടെ പ്രതീക്ഷയുടെ ഉറവിടം" എന്നും "ശരിയും തെറ്റും നിർണ്ണയിക്കുന്നതിനുള്ള ഒരു റഫറൻസ് പോയന്റ്" എന്നും പ്രഖ്യാപിച്ചു.