അനാഹത ചക്രത്തിന്റെ അടിസ്ഥാന ഗുണം നിരുപാധികമായ സ്നേഹമാണ്. ആത്മസാക്ഷാത്കാരത്തിന് ശേഷം ഈ ചക്രം പ്രവർത്തനക്ഷമമാകുമ്പോൾ, ആത്മവിശ്വാസവും, സ്വന്തമായ സ്ഥിരപ്രത്യാശയും, ധാർമ്മിക ഉത്തരവാദിത്വവും വൈകാരികമായി സന്തുലനവും അനുഭവിക്കാൻ നമ്മൾ പ്രാപ്തരാകുന്നു. ഈ സൂക്ഷ്മ കേന്ദ്രത്തിന്റെ ഗുണങ്ങൾ നമ്മുടെ അവബോധത്തിൽ വികസിക്കുമ്പോൾ, അസ്തിത്വത്തിന്റെ നിർമ്മലമായ ആനന്ദം നാം അനുഭവിക്കുന്നു. നമ്മുടെ ജീവിതത്തിന്റെ യഥാർത്ഥ ലക്ഷ്യം നാം കണ്ടെത്തുകയും ആത്മീയ അവബോധത്തിന്റെ ഉയർന്ന അവസ്ഥയിലേക്ക് പരിണമിക്കാൻ നിരന്തരം പരിശ്രമിക്കുകയും ചെയ്യുന്നു.

അനുഭവവും നേട്ടങ്ങളും:
അനാഹത ചക്രത്തിന്റെ ഏറ്റവും പ്രധാനപ്പെട്ട ശരീരശാസ്ത്രപരമായ പ്രവർത്തനം നിങ്ങളുടെ ഹൃദയത്തെയും ശ്വാസകോശത്തെയും നിയന്ത്രിക്കുക എന്നതാണ്. ഈ അവയവങ്ങൾ നിങ്ങളുടെ രക്തചംക്രമണത്തിന്റെയും, ശ്വസനവ്യവസ്ഥയുടെ ആരോഗ്യത്തേയും നിയന്ത്രിക്കുന്നു, അങ്ങനെ തികച്ചും പ്രവർത്തനക്ഷമതയുള്ളതാക്കുന്നു. അനാഹത ചക്രം സ്തനങ്ങളെയും തൈമസ് ഗ്രന്ഥിയേയും നിയന്ത്രിക്കുന്നു. തൈമസ് ഗ്രന്ഥി നിങ്ങളുടെ മാറെല്ലിനു പുറകിൽ, മുകളിലായി സ്ഥിതി ചെയ്യുന്ന ഒരു ചെറിയ ഗ്രന്ഥിയാണ്.നിങ്ങളുടെ രോഗപ്രതിരോധ വ്യവസ്ഥയുടെ പ്രവർത്തനത്തിന് അത് അത്യന്താപേക്ഷിതമാണ്.

ചില സമയങ്ങളിൽ, നമ്മുടെ സ്നേഹവും, അനുകമ്പയും അധികാരത്തിന്റെയും സ്വാർത്ഥതയുടെയും അഭികാമ്യമല്ലാത്ത വികാരങ്ങളുമായി ആശയക്കുഴപ്പത്തിലാകുന്നു. സഹജയോഗ നിങ്ങളുടെ ഹൃദയത്തെ ദിവ്യമായ ഊർജ്ജം കൊണ്ട് നിറയ്ക്കുന്നതിനാൽ, നിങ്ങൾക്ക് ആ വ്യത്യാസം തിരിച്ചറിയാൻ കഴിയുന്നു. മറ്റുള്ളവരുടെ ആവശ്യങ്ങളെക്കുറിച്ച് നിങ്ങൾ കൂടുതൽ ബോധവാന്മാരാകും. നിസ്സ്വാർത്ഥമായും, നിർമ്മലമായും സ്നേഹിക്കാൻ നിങ്ങൾക്ക് കഴിയും.

മറ്റ് പല ചക്രങ്ങളേയും പോലെ, ദൈനംദിന ജീവിതത്തിലെ സമ്മർദ്ദങ്ങൾ ഹൃദയ ചക്രത്തിന്റെ തടസ്സത്തിനും അസന്തുലിതാവസ്ഥയ്ക്കും ഇടയാകും.അമിതമായ ചിന്ത, അതിമാത്രമായ ആസൂത്രണം, അരക്ഷിതാവസ്ഥ, ഉത്കണ്ഠ എന്നിവയെല്ലാം നിങ്ങളുടെ അനാഹത ചക്രത്തിന്റെ അസന്തുലിതാവസ്ഥയ്ക്ക് കാരണമായേക്കാം. എന്നിരുന്നാലും, ധ്യാനത്തിലൂടെ ഈ ചക്രത്തെ ഊർജ്വസ്വലമാക്കുമ്പോൾ, നിങ്ങൾ സന്തുലിതാവസ്ഥ വീണ്ടെടുക്കുന്നു. നിങ്ങൾക്ക് ആത്മവിശ്വാസവും സുരക്ഷിതത്വവും അനുഭവപ്പെടും, നിഷേധാത്മക സ്വാധീനങ്ങളോട് പ്രതിരോധിക്കും.ഹൃദയ ചക്രം ശക്തമാകുമ്പോൾ, ജീവിതത്തിലെ ആനന്ദത്തെ നിങ്ങൾക്ക് പൂർണ്ണമായി ആസ്വദിക്കാൻ കഴിയുന്നു.

പ്രതികൂലമായ മാതൃ- പിതൃ ബന്ധങ്ങൾ നിങ്ങൾ അനുഭവിച്ചിട്ടുണ്ടെങ്കിൽ,ശക്തമായ അനാഹത ചക്രത്തിന് അവ പരിഹരിക്കുന്നതിനായി നിങ്ങളെ സഹായിക്കാനാകും. നിങ്ങളുടെ സ്വന്തം പെരുമാറ്റത്തിന് അതിരുകൾ നിശ്ചയിക്കാനും മറ്റുള്ളവരുടെ അതിരുകളെ ബഹുമാനിക്കാനും നിങ്ങൾ പഠിക്കും. അതിന്റെ ഫലമായി നിങ്ങളുടെ എല്ലാ ബന്ധങ്ങളും മെച്ചപ്പെടും.

സ്വയം വിലയിരുത്തൽ:
നിങ്ങളുടെ അനാഹത ചക്രത്തിൽ തടസ്സം അല്ലെങ്കിൽ അസന്തുലിതാവസ്ഥ അനുഭവപ്പെടുന്നുണ്ടെങ്കിൽ, ഹൃദയമിടിപ്പ്, ആസ്ത്മ, ദുർബലമായ രോഗപ്രതിരോധ ശേഷി തുടങ്ങിയ ലക്ഷണങ്ങൾ നിങ്ങൾക്ക് അനുഭവപ്പെട്ടേക്കാം. ഏറ്റവും രൂക്ഷമമായ അവസ്ഥകളിൽ, ഹൃദയാഘാതം, സ്തനാർബുദം, ശ്വാസകോശ രോഗങ്ങൾ എന്നിവ ഉണ്ടായേക്കാം. എന്നിരുന്നാലും, നിങ്ങൾ അത്തരമൊരു അവസ്ഥയിൽ എത്തിയിരിക്കാൻ സാധ്യതയില്ല. ഈ ചക്രം സന്തുലിതമാക്കുന്നത് ലളിതമാണ്, മാത്രമല്ല ഈ ഗുരുതരമായ രോഗങ്ങളെ തടയാനും, കാര്യമല്ലാത്ത ലക്ഷണങ്ങളെ കുറയ്ക്കാനും ഇത് നിങ്ങളെ സഹായിക്കും.

അസന്തുലിതാവസ്ഥയ്ക്കുള്ള കാരണങ്ങൾ:

• ഭയം
• ഉയർന്ന ഉത്തരവാദിത്തം / ഉത്തരവാദിത്തമില്ലായ്മ
• വെറും സ്വാർത്ഥതാൽപ്പര്യം

എങ്ങനെ സന്തുലനം ചെയ്യാം:
നിങ്ങളുടെ അനാഹത ചക്രം സന്തുലിതമാക്കണമെങ്കിൽ, നിരവധി സെക്കൻഡുകൾ ആഴത്തിലും സാവധാനത്തിലും ശ്വസിക്കുക. ശ്വാസം ഉള്ളിലേക്ക് എടുക്കുകയും പുറത്തേക്ക് വിടുകയും ചെയ്യുമ്പോൾ നിങ്ങൾക്ക് ശാന്തത അനുഭവപ്പെടുന്നു. ആഴത്തിൽ ശ്വാസം ഉള്ളിലേക്ക് എടുത്ത് കുറച്ച് സെക്കൻഡുകൾ വിടാതിരിക്കുക. പിന്നെ സാവധാനത്തിലും സുഗമമായും ശ്വാസം വിടുക. ഈ പ്രക്രിയ നിരവധി തവണ ആവർത്തിക്കുക.

നിങ്ങളുടെ വലത്, മദ്ധ്യഭാഗം, ഇടത് വശത്തുമുള്ള ഹൃദയ ചക്രങ്ങൾക്ക്, സന്തുലനം കൊണ്ടുവരാൻ ഇനി പറയുന്ന രീതിയും ഉപയോഗിക്കാവുന്നതാണ്. നിങ്ങളുടെ വലതു കൈപ്പത്തി ഹൃദയ ചക്രത്തിൽ നിന്ന് കുറച്ച് ഇഞ്ചുകൾ അകലെ അകത്തേക്ക് അഭിമുഖീകരിച്ച് വെക്കുക. നിങ്ങളുടെ കൈകളിലൂടെ ഊർജ്ജം ഒഴുകുന്നതായി അനുഭവപ്പെടുമ്പോൾ, ഹൃദയ ചക്രത്തിന് ചുറ്റും ഘടികാരദിശയിൽ തിരിക്കുക. ഭ്രമണം നിരവധി തവണ ആവർത്തിക്കുക.

ധ്യാനത്തിലിരിക്കുമ്പോൾ, പ്രത്യേകിച്ച് ഇടതു ഹൃദയം സന്തുലിതമാക്കാനായി വലത്തു കൈപ്പത്തി, ഇടത് ഹൃദയത്തിൽ വച്ചുകൊണ്ട് ഈ വാക്കുകൾ പലതവണ പറയുക: "ഞാൻ എന്റെ ആത്മാവുമായി ഒന്നിച്ചിരിക്കുന്നു" ഈ വാക്കുകളെ നിങ്ങളുടെ ഹൃദയത്തിൽ അനുഭവിക്കുക കൂടി ചെയ്യുക.