ഓരോ മനുഷ്യനിലും സഹജമായ ഒരു ആത്മീയ സാധ്യതയുണ്ടെന്നും അത് സ്വയമേവ ഉണർത്താൻ കഴിയുന്നതാണെന്നും ശ്രീ മാതാജി സമർത്ഥിച്ചു.ആത്മസാക്ഷാത്കാരം എന്ന് വിശേഷിപ്പിക്കപ്പെടുന്ന ഈ അവബോധം വിലയ്‌ക്ക് വാങ്ങാൻ കഴിയാത്തതാണെന്ന് അവർ ഊന്നി പറഞ്ഞു. ആത്മസാക്ഷാത്കാരം എന്ന അനുഭവം നേടുന്നതിനോ, സഹജയോഗ ധ്യാനം പഠിപ്പിക്കുന്നതിനോ പണം ഇന്നുവരെ ഈടാക്കിയിട്ടില്ല, ഒരിക്കലും ഈടാക്കുകയും ഇല്ല.

സഹജയോഗ ധ്യാനപരിശീലനത്തിലൂടെ കൈവരുന്ന ആന്തരിക സന്തുലിതാവസ്ഥയും, സമ്മർദ്ദത്തിലുള്ള കുറവും, ലോകമെമ്പാടുമുള്ള ലക്ഷക്കണക്കിന് ആളുകൾക്ക് ഇതിനകം തന്നെ അതിന്റെ പ്രയോജനം ലഭ്യമായിട്ടുണ്ട്. നമ്മുടെ ഉള്ളിൽ അന്തർലീനമായ, ആത്മീയ ഊർജ്ജത്തെ വേഗത്തിലും എളുപ്പത്തിലും ഉണർത്തുവാനുള്ള കഴിവ് – ഒപ്പം അതിന്റെ പ്രയോജനങ്ങൾ അനുഭവിക്കുക – ഇവ സഹജയോഗയെ മറ്റ് ധ്യാനരീതികളിൽ നിന്ന് വ്യത്യസ്തമാക്കുന്നു. പരിശീലനത്തിലൂടെ, വ്യക്തികൾക്ക് അവരുടെ സ്വന്തം ഊർജ്ജത്തെ നിയന്ത്രിക്കാൻ കഴിയുന്നു എന്നുമാത്രമല്ല, മാനസികവും ശാരീരികവും വൈകാരികവുമായ അസന്തുലിതാവസ്ഥകളെ പരിഹരിക്കുന്നതിലൂടെ, ക്ഷേമവും സ്വച്ഛതയും ആത്മനിർവൃതിയും കൈവരിക്കാൻ കഴിയുന്നു.

ഇപ്പോൾ 100-ലധികം രാജ്യങ്ങളിൽ സ്ഥാപിതമായ സഹജയോഗയ്ക്ക് പുറമേ, ശ്രീ മാതാജി നിർധനരായ സ്ത്രീകൾക്കും കുട്ടികൾക്കുമായി ഒരു സർക്കാരിതര സ്ഥാപനം, സമഗ്രമായ പാഠ്യപദ്ധതി പിന്തുടരുന്ന നിരവധി അന്താരാഷ്ട്ര സ്കൂളുകൾ, സഹജയോഗ ധ്യാന രീതികളിലൂടെ ചികിത്സ നൽകുന്ന ആരോഗ്യ ക്ലിനിക്കുകൾ, നൃത്തം, സംഗീതം, പെയിന്റിംഗ് എന്നീ കഴിവുകൾ പുനരുജ്ജീവിപ്പിക്കാൻ ഉതകുന്ന ഒരു കലാ വിദ്യാപീഠവും സ്ഥാപിച്ചു.